Ալեքսանդր Թամանյանի անվան Ճարտարապետության ազգային թանգարան-ինստիտուտի հետ համատեղ գինու պատմության թանգարանում օրերս բացվեց

ժամանակավոր ցուցադրություն՝ Գինին ճարտարապետ Ռաֆայել Իսրայելյանի արվեստում։

Ապակե սափորների, գավաթների, կաթսաների, քացախամանների և գինու խցանահանների էսքիզներ՝ համեմված ազգային մոտիվներով։ Ինչպես ճարտարապետության մեջ, այնպես էլ կիրառական արվեստում Ռաֆայել Իսրայելյանը օգտագործել է խաղողի ու նռան պատկերներ, որոնք, ինչպես միշտ, տարբերվում են իրենց գեղագիտական ​​մորֆոլոգիայով։ 

Ցուցադրության բացման առիթով կազմակերպված միջոցառմանը ներկա էին հյուրեր Հայաստանի մի շարք թանգարաններից, որոնք  մեծ ուրախությամբ ընդունեցին թանգարանների միջև գործակցության նախագծերը՝ կարևորելով համատեղ աշխատանքը։

Ճարտարապետի էսքիզներին արդեն կարող եք ծանոթանալ Հայաստանի գինու պատմության թանգարանի նոր սրահում։

 

Շարունակելով ակտիվ համագործակցությունը հայաստանյան թանգարանների հետ՝ հուշագիր է ստորագրվել նաև Հայաստանի գինու պատմության թանգարանի և Արամ Խաչատրյանի տուն-թանգարանի միջև, որի համաձայն առաջիկայում կյանքի կկոչվեն մի շարք նոր ծրագրեր։

Հայաստանի գինու պատմության թանգարանի հարևանությամբ տեղակայված կոնյակի հնացման մառանում արդեն 10 տարի է 24/7 հնչում է Խաչատրյանի հանճարեղ մեղեդին, ուստի շուտով խաչատրյանական շունչը կբերենք նաև Հայաստանի գինու պատմության թանգարան, որտեղ կցուցադրվեն մի շարք ցուցանմուշներ՝ բերված կոմպոզիտորի տուն-թանգարանից։

Հայաստանի գինու պատմության թանգարանը, Արմենիա Վայն գինեգործարանի հետ համատեղ, թողարկել է նաև սահմանափակ քանակությամբ ռոզե գինի ՝ Արամ Խաչատրյանի «Գայանե» բալետի առաջնախաղի պիտակով։